Gelinsoor News Agency (GNA)

DAAWO SIRTA KHILAAFKA LABADA SHEEKH....qormo kaftan siyaasadeed ah."wada akhri si aad u wada fahamto muhiimada qormadan" note-ka qoraaga.

By Abukar Albadri
Saxafi madaxbanaan:

Anigoo aad uga murugeysan masiibada ku habsatay hoggaanka halgankii dib u xureynta ayaan si hal haleel ah ku seexday, tiiyoo aaney hurdo fiicanba iga soo dhicin ayuu ii yimid haatuf, shaki iyo cabsi weyn ayuuna igu beeray.
Cabsida aan dareemay darteed baan riiraxyo tirtay, wejigana sacabkaan mariyey, hareeraha ayaan eeg eegay misana meel aan iga fogeyn oo horteyda ah ayaa waxaa dig ku soo yiri shimbir ii wada dhambaal ku sajilan baqshad.
Haddiiba baqshadii ayaan furay, waxaana ku jirey cajal CD ah oo ay dusha kaga qoran tahay "DAAWO SIRTA KHILAAFKA" waan yaabay, indhahaan markale sacabka mariyey, hadana dib baan u eegay si aan u hubsado inuu qoraalkani sax yahay iyo in ay indhaheyga yihiin kuwa beensheegaya, laakiin hubsaday cinwaankii cajalka.

Dabadeed maxaa dhacay...? Durba waan furay, waan shiday, daawashaan u galay, intaanan ka gudbin boggii 1-aad ee cajalka ayaa waxaa iga soo horbaxay codsi aniga igu socday oo u qornaa (FADLAN NOQO NABAD-JIRE OO DHAXGAL LABADA SHEEKH)

Waan sii eegay oo waxaa codsiga soo direy doolli yar oo intuu ka qaxay Muqdisho ku dhibaateysan duleedka xeebta Jasiira, misana rajo wanaagsan ka qabay heshiiskii Jabuuti.

Doolliga wuxuu aad uga walaacsanaa inuu ka sii qaxo meesha uu maciinka biday, ka dibna aniga oo qiimeynaayey xaaladdii ayaan aqbalay codsigii doolliga.
Waxaan isu diyaariyey inaan NABAD-JIRE noqdo oo aan dhaxgalo labada Sheekh ee talada ka halaawday.
Si nabadda aan raadinaayo iyo xaalka sida uu yahay aan wax badan uga ogaado ayaan u sii dhaadhacay guntii hoose ee cajalkii, waan daawaday dhammaantii si qumaati ah, cajalka wuxuu lahaa qeyb 1-aad iyo qeyb 2-aad oo ka kooban jilliino kala gedisan.
QEYBTA 1-AAD
Cajalku wuxuu ka bilaabanayey koox culimadda suufiyadda ah oo meel siyaaro ah ku digrinaya, cayaal ku cayaarayey meel iskuul ahaan jirtay iyo hooyooyin safaf dhaadheer ugu jirey goob caafimaad oo ay dhakhaatiir ka yihiin niman madmadoow oo wejiyo qalfoof ah leh.

Anigoo intii la yaaban ayuu cajalkii sii socday, waxaana horteyda yimid qeyb cusub oo anigii cajalka daawanaayey ka dhax muuqdo, (graphic content....) waan yaabay, waxaan gashanahay dhar cad cad, wejigana waxaa iigu xiran maro cad oo ay ku qoran tahay "WAXAAN AHAY NABAD-JIRE"

Waxaan bilaabay geeddigii aan ku baadi goobaayey sidii aan ula kulmi lahaa labaddii Sheekh ee aan dhaxgali lahaa arrintooda.

Ugu horeyn waxaan ka soo bilaabay Sheekh Xasan Daahir Aweys, waxaan iska soo xaadiriyey xafiiskiisii, markii aan u sheegay xogheyntii in aan ahay NABAD-JIRE doonaya inuu Sheekha la kulmo ayey ii sheegeen inuu jiro liis lagu qoro dadka doonaaya in ay Sheekha qaabilaan, liiskii ayaan isku qoray, waxaana ahaa qofka 1000-aad (kumaad) ee liiska ku qornaa, welina dad baa iga sii dambeeyey.
Maalmo ayey igu qaadatay in aan sugo la kulankii Sheekha, xogheyntiina warkeygiiba way diideen, anigiina maadaama aan balan ku soo galay in aan nabad ka dhaxdhaliyo labada Sheekh iima furneyn jid kale oo aan ka aheyn inaan la kulmo, anigoo kaashanaya Allaah.

Ileen Soomaali laalaab kama dhamaadee,markii aan xaalka ku jahwareeray ayaan bilaabay inaan si laalaab ah ku raadiyo la kulanka Sheekha oo aan iska dhaafo liiska baas.

Qolka uu Sheekha ku jirey wuxuu lahaa afar irdood oo mid walba ay jiho ku taalo, iriddii waqooyi ayaan kaga imid, balse waxaa safka igaaga soo horeeyey nin la ii sheegay inuu yahay ergayga Eritrea u fadhiya isbaheysiga dib u xoreynta, gadaashiisna waxaa taagnaa safiirka Iiraan u fadhiya Midowga Africa oo uu jeebkiisa ku jiro sawirka madaxweynihii hore ee ruushka Vladimir Putin, waxeyna horteyda meeshaasi taagnaayeen dhawr maalmood, waxaa loo sheegay inuu Sheekhu ku jiro hawl qaran oo aad u muhiim ah.

Dhankii qiblada markaan ku soo shiiday, waxaan iska soo xaadiriyey illinkii galbeed, dadka dhooban darteed waxaanba is iri mudaaharaad ayaa ka jira, waxeyna indhaheyga qabanayeen wasiirka arrimaha dibadda Yaman iyo kan Masar oo isla taagan, misana gunuunacaya, is-hiifaaya oo leh, "ma shakhsi Soomaali ah ayaan intaan ka badan u taagnaan karnaa" laakiin safiirkii Yaman baa ku jawaabay "anagaa dan leh", Sheekhiina weli hawshiisii qaran ayuu ku jirey.
Halkiina waan ka soo quustay, ka dibna waxaan imid afaafkii koofureed ee xafiiska, meeshan waxaa joogeen niman sita calamaanta Kenya, Tanzania iyo Rwanda, waan yaabay, waxaan is iri Sheekha tolow ma madaxweynuu noqday.

Haseyeeshee waxaa halkaas iiga soo horeeyeen dad dhawr ah oo Soomaali ah, iyagu rajo beel ayeyba taagnaayeen oo bishiiba mar ayaa albaabkaasi koofureed ee xafiiska Sheekh Xassan la furaa ayey igu yiraahdeen, bishana waa calaf oo qofka nasiib u yeesha ayaa ka galaaya.

Markii aan ka quustay sedaxdii albaab ayaan u dhaqaaqay albaabkii dhanka bari ku yaalay, waa albaabkii ugu dambeeyey ee aan isku dayi lahaa in aan sheekha uga soo galo.

Albaabkani ma dad badneyn, waxaa taagnaa nin isugu keey sheegay inuu yahay Suudaani, wuxuuna usha u hayey nin indhoole ah oo Ugandhees ah, indhoolka Ugandhees wuxuu dusha ku xambaarsanaa wasiirka arrimaha dibada Itoobiya Siyuum Misfin oo ay afka ugu jirtay masaasad (caagadda caruurta la nuujiyo) oo uu dusha kaga sawiran yahay calanka Mareykanka, meel aan sidaas uga fogeynna waxaa taagneyd Jenday Frezer oo cayaarsiineysa ninka dusha lagu waday, indhaha ayey ka cayaarsiineysa sida ay hooyooyinka caruurta uga cayaarsiiyaan ayeyna u cayaarsiineysay, isagana wuu qoslaayey.

Waan ka naxay qoladan, waxaan weydiiyey "maxaa meeshan idin dhigay?" waxey yiraahdeen Sheekha ayaan doonaynaa, dan la yiraahdo IGAD ayaa isku keen soo qasabtay laakiin isku dan ma nihin sedaxdeena ayeyna ii raaciyeen.

Waxaan eegay Albaabkii waxaa ku qorneyd ALBAABKA RAJADA, markiiba waxaan istaagay halkii ugu horeysay ee albaabka, waan garaacay, waxaana iga furey nin xogheyn ah, markii aan u sheegay in aan ahay NABAD-JIRE doonaya inuu Sheekha la kulmo wuu isoo dhoweeyey, wuxuu ii gudbiyey qolkii Sheekha, waxaan soo galay qolkii Sheekha, misana Sheekha nin ajnabi ah ayaa wuxuu gudaha ku barayaa luuqadda Ingiriiska, wuxuuna doonayaa inuu qaabilaadda bilaabo marka uu barto wixii uu kula hadli lahaa madaxda safka ugu jirta.
Sheekha waxaan u sheegay inaan muddo maalmo ah u joogay banaanka xafiiskiisa sidii aan ula kulmo, wuxuuna iigu cudurdaartay "walaaloow tarjumaanadii baan ka shakinay, waxaan go'aansaday inaan si koorso deg deg (Intensive Course) ah ku barto luuqadda Ingiriiska oo aan wax dambe la ii tarjumin, waana hawl qaran"

Waxaan ka codsaday inuu iga ogolaado inaan dhaxgalo isaga iyo Sheekhii ay iskhilaafeen, wuuna iga yeelay, laakiin wuxuu shuruud ka dhigay in heshiiska ay qeyb ka ahaato Eritrea haddii la doonaayo in uu meel maro.

Waxaan la fajacay inta dhib ee aan u maray Sheekha la kulankiisa iyo inta dimpolaasiyiin banaanka u taagneyd iyo ... luuqadda Englishka.
Sidii ayaan kaga soo ruqaansaday dhankii Xafiiskiisa, waxaana iska soo xaadiriyey Xaruntii Sheekh Shariif si aan ula kulmo isagana oo aan uga raadiyo nabad.
Sheekh Shariif ma laheyn xafiis oo wuxuu si KMG ah u deganaa Hoteel, isla hoteelka ayuu hawshiisa qaran ku watay, wuxuuna dadka ku qaabilayey fadhi yar oo qolkiisa qeyb ka mid ah yaalay.
Markii aan imidba waxaan xogheyntii u sheegay in aan ahay NABAD-JIRE doonaaya inuu Sheekha la kulmo, layma daahine waa la ii gudbiyey, waxaana ugu soo galay qolkii uu ku jirey.
Weji furan ayuu igu qaabilay, waxaa qolka kula jirey nin Carab oo gashan koofid uu ku sawiran yahay calanka dowladda Qadar, carabku wuxuu Sheekha tus tusaayey Album sawiro ah oo ay ku jiraan madaxda reer galbeedka iyo xulufadooda Carabta.

Albumka korkiisa waxaa ku qornaa qoraal English ah oo u dhignaa "You are either with us or with them!!!"

Sheekh Shariif ayaan codsigeyga u bandhigay, laakiin wuxuu igu dhahay "haddii aad ka soo dhameysato Axmadu Walad Cabdalla anaga waxba kama qabno, nabadda waan kaa qaadanaynaa".
QEYBTA 2-AAD
Qeybta labaad ee cajalka waxey ka bilaabaneysay Qanyare iyo Muuse Suudi oo taleefoon ku sheekeysanaaya.

Qanyare oo la yaabay khilaafka ka dhax aloosmay labada Sheekh ee isaga iyo asxaabtiis kol hore ka qabsatay Muqdisho ayaa taleefoon ku wacay Muuse Suudi wuxuuna leeyahay "Muuse ka waran wadaadkii iyo cayaalkiisa waxa ka dhax dhacaya, waan dareemayey in CIA aysan ku sabreyn in anaga nalaga adkaaday oo qura, hadeertan waxaan fahmay in dhamaan danley la wada yahay oo qof mabda' lagu raacaay uusan jirin"

Muuse Suudi ayaa ugu jawaabay "Kuwaan armey na siraayaan oo aysan khilaafka runtooda aheyn" Qanyare oo khilaafka ku raaxeysanaaya ayaa intuu koob kafee ugu jirey soo qaaday si haaneed lehna u kabooday wuxuu yiri "Walle waa ka dhab, waaba xarfaan kuwan, anagaa fahmi weynay maahee waa raggedii...!!!"
Muuse Suudi wuxuu hadlakiisii ku soo koobay "Mineey xarfaan yihiin Bashiir Raage ayey isfahmi lahaayeen"

Qanyare oo ku raaxeysanayey hadalkii Muuse ayaa wuxuu la sara istaagay qosol dheer oo sababay in xildhibaano hurdaayey oo ay ka mid ahaayeen Salaad Cali Jeelle iyo Cumar Finish soo kacaan.

Jilliinka xigay qeybtan wuxuu ahaa Raiisal wasaarihii hore ee Soomaaliya Md. C/Rasaaq Xaaji Xuseen oo ku dul ooyaaya qabrigii Madaxweynihii hore ee Soomaaliya Aadan Cadde dushiisa Allaah ha u naxariistee.

Aniga C/Rasaaq Xaaji Xuseen aqoon uma laheyn, laakiin waxaan weydiiyey "adeer maxaad halkaan ugu oyneysaa?" wuxuuna iigu jawaabay "ninkan wuxuu igala dhintay fure muhiim ah, markii uu noolaa waan hilmaansanaa, laakiin markuu dhintay ayaan soo xasuustay, hadeerna iima soo noqonayo".

Jilliinka xigayna wuxuu ahaa nin Australian ah oo u shaqeeya hay'ad ka mid ah hay'adaha gargaarka oo duceysanaaya, wuxuuna leeyahay "Ilaahoow Soomaaliya nabad hasiin ilaa aan guri raaxo ka dhisto magaaladda Melbourne"
FILLIMKAN QEYB MUHIIM AH BUU LAHAA OO LAGU JILAAYEY MADAXTOOYADA.
Jilliinkan waa ay igu adkaatay in aan galo madaxtooyadda, waayo dhinicii aan is iraahdo ka soo gal waxaa qori kala soo jeeday askari itoobiyaan ah oo difaacanaya Madaxtooyada, irrideeda waxaa ku qorneyd Soomaali "No" Itoobiyaan, Ugadhees iyo Burundi "Free"

Gudaha madaxtooyada waxaa ka socda hawlo kala duwan, qeybta ugu horeysa marka ganjeelka laga soo galo waxaa lagu tababarayey dhallinyaro Itoobiyaan ah oo ku lebisan darees ciidan, waxaana la baraayey sida meelaha ay dadka rayidka ahku badan yihiin madaafiicda loogu garaaco, mar marna si baroobo ah ayey dhanka Suuqa Bakaaraha ugu tijaabinaayeen qoriga BM-ka.

Gadaashooda waxaa joogay saraakiil Soomaali oo Janaraalo ah iyo rag wasiiro ka ahaa TFG-dii Cali Maxamed Geedi, kuwaas oo cunto u karinaayey askarta itoobiyaanka ah ee tababarka u socday.

Saraakiishaasi waxaan ka aqoonsaday General Ismaaciil Qaasim Naaji iyo Ismaaciil Buubaa.

Qeybtii xafiiska madaxweynaha ee uu fadhiisan jirey Madaxweyne Maxamed Siyaad Barre waxaa laga dhigay baar weyn oo ay ka cunteeyaan niman caddaan ah oo dharka ay ku lebisan yihiin ay ku qornayd CIA, FBI iyo MI6.
Dalabka qadada maqaayadaasi laga helaayey waxaa ugu qaalisnaa hilbo iigu muuqdo lugo iyo gacmo caruur ah oo dhaylo ah (hilib dad), kuwaas oo lagu iibinaayey qiimaha ugu sarreeyey.

Maqaayadan waxaa kookayaal ka ahaa Maxamed Dheere iyo Cabdi Qeybdiid, waxaana kabaryeeriyeyaal ka ahaa Maxamed Maxamuud Guuleed (Gacmodheere), Jeneraal Moorgan iyo Sheekh Aadan Madoobe.
Calooshaa i hurtay markaan arkay hilbihii caruurta oo lagu qadeynayo, waan yalaalugooday, balse ma hunqaacin.

Qeybtii hoyga madaxtooyadda oo ay ku jiraan C/laahi Yuusuf iyo Nuur Cadde irideeda waxaa joogay Jeneral Darwiish oo kabo caseysanayey.
Gudaha qolka C/laahi Yuusuf iyo Nuur Cadde waxey aad ugu mashquulsanaayeen oo fiirsanayeen filimka kartuunka ah ee (TOM and JERRY), waxeyna ku murmayeen "anigaa JERRY ah iyo ma tihide anigaa ah", waxaana aktooda fadhiyey Axmed C/Salaam oo u tarjumaayey wixii hadba Mukulaasha iyo Dooliga filimka jilaaya ay iskula hadlaan.

Jilliinka iigu yaabka badnaa ee cajalkaasi ku jirey wuxuu ahaa qaar ka mid ah madaxda muqaawamada ee ku sugneyd gudaha dalka, waxey yeelanayeen shir deg deg ah, waxeyna ku shirayeen duleedka magaaladda Muqdisho iyagoo ka wada xaajoonaya hadladii ka soo kala yeeray labada Sheekh ee ugu sarreeyey muqaawamada.

Mid ka mid ah raggii Muqaawamada hogaankoodii ahaa ayaa wuxuu kooxdii kale weydiiyey su'aal, wuxuuna yiri "madaxdeena way is khilaafeen ee anagana ma haddaan is khilaafnaa oo kala baxnaa mise markaan iska dhicino ciidamada Copy-ga ah ee dhowaan la keenay ayaan kala baxnaa?"

Nin ayaa ku jawaabay "hadaan hadda iskhilaafno waa nalagu kala tagaaye, intaan iska deyno nimankaas hoteelada qaboow ku jira warkooda maku heshiinaa in aan dhisano isbaheysiga dib u xoreynta garabka Muqdisho?"
Meel gees ah ayuu Abuu Mansuur gacanta ka taagay oo yiri "anaga haddaan nahay Al-Shabaab awalba kama mid aheyn wax la yiraahdo isbaheysi dib u xoreyn, haddii uu jihaadja dhab idinka yahayna waxaan idinku boorinayaa dhamaantiin in aad anaga nagu soo biirtaan"

Hadalkooda marna wuxuu noqonayey muran marna degganaan ayey ku wada hadlayeen, waxaana laga carooday "nagu soo biira"
Inta ay doodahaasi kulul yeelanayeen kooxda muqaawamada ah waxaa meel geed hoostiisa ah oo u dhaw meesha uu shirka ka socday fadhiyey oo ooynayeen Sheekh Maxamuud Sheekh Ibraahim Suuleey iyo Sheekh C/qaadir Cali Cumar oo ku calaacalayey "Ma hadduu jihaadkii isu rogay kursi doon?" si dhakafaar ah ayeyna dhabanada u heysteen.

Iyadoo aan waxba lagu heshiin oo weli doodu tahay "Yaa haray oo hadlaaya" ayaa waxaa bilaabatay Xabad, waxaana laba jiho ka soo weerareen ciidamada Dowlada KMG-ka ah oo soo maqlay in ay Muqaawamadii shireyso, sidii ayeyna kulligood ku galeen dagaalkii, iyagoo aan heshiis ka gaarin qodobkii ay ka shirayeen, welibana isku af garan magaca lagu dagaalamayo iyo SHEEKHA-KOOXEEDKA laga amar qaadanayo.

Qeybta ugu dambeysa filimka ayaa wuxuu ahaa meel u ek xerooyin ay ku nool yihiin dad qaxooti ah, waxaana ka muuqday dhawr qofood oo feero qaawan, macluulsan, misana daruufta heysa darteed aanu jirin mid u jeeda midka kale.
Dhinacyada Kaamka waxaa ku yaalay qabuuro ay ku sharaxan yihiin tabeelayaal hay'adeed, waxaana ku qornaa tilmaamo ay ka mid ahaayeen QABUURAHA WFP, QABUURAHA UNDP, QABUURAHA UNICEF, QABUURAHA MSF, QABUURAHA CARE INTERNATIONAL, QABUURAHA DRC, QABUURAHA JUUJ WA MAAJUUJ, QABUURAHA HUMAN RIGHTS-KA, QABUURAHA LOCAL NGOs iyo kuwo kale.
Inta uusan dhamaan filimka ka sheekeynayey SIRTA KHILAAFKA waxaa jira tabeello weyn oo xayeysiin ah, waxaana ku qorneyd "WAA BEEC, WAANA KIRO" waxaana hoosta tabeelaha ku sawirnaa Soomaaliya oo loo kala gooyey sedax meelood, laba meel oo kiro loo rabo iyo meel beec ah.

Dhanka badda waxaa is daba taxnaa maraakiib la iigu sheegay in ay wadaan dadkii Soomaaliya u dhashay oo loo daabulaayo Jaziiradaha la kala yiraahdo (SILAC iyo QUUS)

Ugu dambeyntiina waxaa ku qornaa isla baaqii uu doolliga diraayey oo ahaa NABAD-JIRE NOQO OO DHAXGAL LABADA SHEEKH.
Waxaan laba jibbaaray dadaalkeygii aan ku raadinaayey nabadda, anigoo is leh bal orodka badi ayaan raacay duulimaad, intaan cirka ku maqnaa ayaa meeshii aan ka duulay hortey baddii ku soo fatahday (dilaacday) dhulkiina bad ayuu noqday, meel aan ku soo dego ayaan waayey, aad ayaan u naxay, ka dibna naxdintii ayaan hurdadii kaga soo toosay.

Hal dhib baa jira, haddii aan hurdadii ka toosay ma hayo hawsheydii NABAD-JIRE-NIMO, haddaan hurdada ku laabtana ma leh dhul aan ku soo dego oo aan hawshii ku wado, dhulka aan soojeedka ku heystana kama maarmo, hawsha aan hurdada ku dhaxwadayna waa muhiim.

Akhristayaasha ayaan laga sugayaa jawaabta qormadan...
Wixii talo iyo dhaliil ah...
abukar.albadri@gmail.com

(Ku noqo Page-ka Hore)

Xafiiska Wararka Gelinsoor News Agency (GNA)
Mogadishu-Somalia
E-Mail: Webmaster@gelinsoor.com
Warar Xaqiiqa ah Kala soco Shabakadda Gelinsoor